Пресс релиз: “Банклардаги омонатларни ҳимоялаш кафолатлари тўғрисида”ги Ўзбекистон Республикасининг қонуни қабул қилинди

 “Банклардаги омонатларни ҳимоялаш кафолатлари тўғрисида”ги Ўзбекистон Республикасининг қонуни қабул қилинди

Жорий йилнинг 19 февралидан “Банклардаги омонатларни ҳимоялаш кафолатлари тўғрисида”ги Ўзбекистон Республикасининг Қонуни кучга кирди.

Мазкур Қонун лойиҳаси Жаҳон банкининг техник кўмагида ишлаб чиқилган бўлиб, ундаги нормалар “Депозитларни суғурталаш халқаро ассоциациясининг”нинг асосий тамойилларига мос келади.

Қонун кўра, жисмоний шахсларнинг омонатлари билан бирга  якка тартибдаги тадбиркорлар, шунингдек юридик шахсларнинг банклардаги омонатлари ҳам кафолатланмоқда.

Шунингдек, Қонунга банк ёпилган тақдирда кафолатланган омонатларни қайтаришни бошлаш муддати босқичма-босқич 7 иш кунигача қисқартириш бўйича норма киритилди. Қонун қабул қилингунга қадар ушбу муддат сал кам 3 ойни  ташкил этган.

Қонунда банк ёпилганда бир банкда бир омонатчига тўланадиган компенсациянинг миқдори 200 млн сўмдан ошмаслиги белгиланди.

Бунда кафолатланган омонат миқдори 200 млн сўм қилиб белгиланиши натижасида банклардаги омонатчиларнинг 99,7 фоизи тўлиқ қамраб олинади.

Бундан ташқари, банк ёпилиши натижасида омонатнинг 200 млн сўмдан ошиқ қисмини йўқотишдан хавотирда бўлган омонатчилар ўз пул маблағларини бўлиб-бўлиб бир нечта банкка жойлаштириш билан тўлиқ кафолатга эга бўлишлари мумкин.

Қонунда белгиланган 200 млн сўмлик компенсация миқдори фуқароларнинг ушбу Қонун кучга кирган санадан олдин очилган омонатларига нисбатан татбиқ этилмайди.

Янги Қонунга кўра, 2002 йилдан фаолият юритиб келган Фуқароларнинг банклардаги омонатларини кафолатлаш фонди негизида Омонатларни кафолатлаш Агентлиги ташкил этилиб, унинг ваколатлари кенгайтирилмоқда.

 Энг муҳими, Қонунга асосан Ўзбекистон Республикасида фаолият кўрсатаётган тижорат банклари аҳоли омонатларини жалб қилиш ҳуқуқига эгалигини ҳисобга олиб, барча банкларнинг омонатларни кафолатлаш тизимида қатнашиши мажбурий эканлиги белгилаб қўйилди.